A lejohet ruajtja e papagajve dhe shpendëve tjerë në shtëpi?

Pyetje: Eselamu alejkum. Zoti ju shperblefte. Deshta me be nje pyetje: A lejohet me i mbajte papagajt ne shtepi mbrenda, se disa thojne qe nuk ben?  

Përgjigje: Alejkumselam. Falenderimi i takon Allahut (azzevexhel), ndërsa salavatet dhe selamet qofshin mbi të Dërguarin tonë Muhamedin (salallahu alejhiveselem), mbi familjen e tij të pastër, mbi shokët e tij besnik, si dhe mbi të gjithë ata që e pasuan dhe e pasojnë rrugën e tij deri në Ditën e Gjykimit.  

Lejohet ruajtja e papagajve në shtëpi dhe nuk ka ndonjë ndalesë për këtë sipas Sheriatit Islam.   

Transmetohet nga Enes ibn Malik (radijallahu anhu) i cili thotë: Ka qenë Pejgamberi (salallahu alejhiveselem) njeriu me moral më të mirë prej të gjithë njerëzve. E kam pasur unë një vëlla të cilit i thonin Ebu Umejr. E Pejgamberi (salallahu alejhiveselem) kur vinte i thonte atij: “O Eba Umejr, çka ka bë Nugejri?”. (Nugejr – është shpend i vogël i cili i përngjanë zogut, e disa kanë thënë është bylbyli) (Transmeton Buhariu dhe Muslimi)  

Thotë Hafidh Ibn Haxheri: Në këtë hadith ka argument se lejohet ruajtja e shpendëve në kafaz dhe të ngjashme me të, vetëmse obligohet për atë i cili e ruan ndonjë prej kafshëve që të sjellet mirë ndaj saj dhe ta ushqejë atë me atë që është e nevojshme, duke u bazuar në fjalën e Pejgamberit (salallahu alejhi veselem) i cili thotë: “Ka hyrë një grua në zjarr për shkak të një maceje të cilën e ka lidhur, nuk e ka ushqyer dhe nuk e ka lejuar të ushqehet me gjërat e tokës”. (Transmeton Buhariu dhe Muslimi)  

Thotë Shejh Ibn Bazi: Nuk ka ndonjë ndalesë për këtë (ruajtjen e shpendëve në kafaz) nëse iu përgatitë atyre ushqim dhe pije, ngase në esencë kjo çështje është e lejuar dhe nuk dijmë ndonjë argument që e kundërshton atë. (Fetava Ulemaul Beledil Haram 1793)  

Allahu e di më së miri.

Hoxhë Omer Bajrami